Wo Ladki…

Forums Dedicated To Someone Wo Ladki…

This topic contains 0 replies, has 1 voice, and was last updated by  Admin 2 weeks, 5 days ago.

  • Post
    Admin
    Keymaster

    Jab hansti hai to kinare wale canine daant bahar nikal ate hain. Aur jab roti hai to naak thoda choti ho jati hai. Ankhe kam bolti hain uski. Par dant’ti jyada hain. Pyar ka paimana hota to uski harkaten top pe hoti. Maths kam ati hai usko pr baaton aur jhagadon ka hisaab pura rakhti hai..

    Khush hoti hai to duniya ki sabse khubsurat bala ban jati hai aur jo dukhi huvi to saant samandar. Roti hai to bas “maa ke paas jana hai” bolti hai aur jo hansi to meri maa ban jati hai.

    Chahe gussa ho ya shararat, tirchi nazar se uska dekhna hamehsa dhadkan badha deta hai. Bate karte karte mujhe chidhana aur kisi purane kand ko leke jhagda kar lena uski purani adat hai. Kam bolti hai, na phone pe aur naa hi samne.. haan pr ankho se prem barabar nikalta rehta hai. kai baar mere lambe lambe msg ka jawab sirf “accha” me deti hai. Pr kai baar uske “accha” ka matlab “I love u” bhi hota hai..

    Meri choti choti galtiyon ko ginne ke bavjood meri sari galtiyan maaf kar deti hai. Fijool kharchi nahi hai. Pakaude lajawab banati hai pr afsos wo mai khata nhi hun.

    Jab paas hoti hai to ekdam paas hoti hai aur jab door hoti hai to mujhme hi hoti hai . Tareekhen usko bilkul yaad nhi rehti. Jaise 24 March bhi wo bhool gyi hai. Is din kuch bahut khaash huwa tha pr likhunga nahi. Kuch kahaniyan likhi nhi jati.

    Hirni jaisi chaal waal nhi hai uski aur uske baal mai kya kahun. Black, brown aur red ka combination hain. Jamun jaisi ankhe hain pr gulab ki pankhudi jaise honth hai. Bahut hi simple si hai wo, ekdam simple. Jaise gharelu daal chawal hota hai na bilkul vaise hi.

    Ishq ke agar mukam hote na to mujhe pehle mukam me rehna hai hamesha.

    Kabhi kabhi kehne ko kitna kuch rehna hai na ? Pr sale ko shabd hi nahi sujhte. Socho kya gujarti hogi mere upar jab tumko mehsoos karna ho aur chuna naa ho.. jab kehna sab tumse hi ho. Pr naam na lena ho.. jab khamoshi shor machati ho aur koi sunne wala bhi naa ho..

    Asan nhi hota duniya ki sabse haseen ladki ko pyar karna. Bilkul bhi nahi…

You must be logged in to reply to this topic.